For Zgharta

COVERING ZGHARTA ZAWIEH

أخبار

كلمة الاعلامي روبير فرنجية في الذكرى ١٩ لغياب الشاعر اسعد السبعلي

مبارح بتوقيت ” غابت الشمس ” وتحت الزنزلختي السبعلية رجعت سطيحة اسعد السبعلي تغمر وتستقبل وتحتضن الصحاب اللي هجروا البيت لما صاحب البيت سافر وطول الغياب .
ناس غنت وناس وقعت على كتب وناس قريت قصايد وبدوري شرفني اختيار احفادو لكون خطيب الحفل وهيدي كلمتي :
مرحبتين
بغيبتك أسعد السبعلي شجرتك اللي بتفيي عالديوان والقصيدة والغنية رميت بذورها والبذور بعد صلا ونذور وترتيلي وبخور انطمرت بتراباتك ونبتت نصوب والشجيرة مهما عليت ورفعت غصونها الفتية ما بتطال غصن من شجرة معمرة وجذعها كبير من سبعل للجميزة ومن الاذاعة اللبنانيي لبيوت كل العرب واللبنانيي .
١٩ سني عمر غيابك ومن ١٩ سني قديش أصحاب يا هالبيت هجروا عتابك وقديش احفادك بيخلقوا المناسبة على هالسطيحة تا تتشرع بوابك .
بغيابك يا سبعلي لحقوك شعرا كتار وكبار . لحقك يوسف روحانا أبن ضيعتك وجورج يمين وانطوان القوال وناصيف الشمر اصدقائك ولحقوك جيرانك البير حرب وجوزاف طوبيا والحببب شربل نعيمي وسايد يمين وسليم فرنجية وفوزي فنيانوس وفتى لبنان وشاعر الازميل بدوي فرح و اللي ولا مرة انعقدت جلسة لحكومة الشعر تحت الزنزلختي وغابوا عنها .
بغيبتك با سبعلي ودينالك مكتوب من ابو جميل مع توأمك وديع الصافي .
بغيبتك ودينالك الكتب اللي صدرت عنك مع يونس الابن وفؤاد عواد وانسي الحاج وجوزاف حرب وجورج جرداق والياس ناصر واميلي نصرالله .
ما قلتلي يا استاذ اسعد عجبك كتابي ” غابت الشمس ” ؟ كتابي او كتابك ؟ شو قلت انت وعم تفلفش بصفحاتو ؟
خذلتك ؟ وفيتك ربع حقك ؟
مبارح حفيدك جان حاصباني اللي صار بيستحق يكون جان السبعلي جال بأرشيف اذاعة لبنان وذهل باللي شفتو من سنين قديشك سخي وقديشك نهر وقديشك غزير كتبت للعشرات من الكبار .
وديع الصافي وصباح ونصري شمس الدين ونور الهدى ونجاح سلام ووداد وسعاد الهاشم وجوزاف عازار وجوزاف ناصيف ومروان محفوظ وهيام يونس وهناء الصافي والهام جحا وماري بشارة وميشال عيسى واوديت كعدو ونادين عواد واقترح الحفيد يتسمى شي استديو باسمك .
اسمك يا اسعد السبعلي بيكبر المدارس والمعاهد والمحطات .
اسمك اسعد السبعلي قيمة مضافة لكل اسم .
اسعد السبعلي يا جارنا يا شاعرنا يا صديقنا ويا زميلنا باذاعة اهدن ايام برنامجك ” قناديل الشعر ” اشتقنا لصوتك ولمنجيرتك ومكاتيبك واشعارك .
اسعد السبعلي كل مرة بحكي عنك او بحاكيك بشعر انني الاسعد وبمحبتك سبعلي .
من ١٩ صيفية بعدنا ماشيين ع توقيت قصايدك ما بيطلع الضو بدون ” طل الصباح ” وما بتدغش الدني بدون ” غابت الشمس ” وشكراً .